人有三衰六旺，但樸茨茅夫嗰種衰法，好似仲未有止境咁；今季由英超跌落英冠，球隊財政又未有起色，球星走吓一個，走吓又一個，季初諗住到美國友賽，點知成個旅程慘過由香港導遊阿珍帶隊嘅購物團。
樸茅都算派出最強人腳出戰北美4場友賽，好似紐根特、米高布朗、梅連斯等都有隨軍，第1場喺7月15日喺加州聖地牙哥對阿美利加會，因為安排失當，由英國到聖地牙哥足足花咗42個鐘，坐飛機坐到腳軟，樸茨結果就輸1:2。
慘吞華盛頓聯4蛋
上星期三樸茅完成第3場友賽，同加拿大嘅FC艾蒙頓踢成1:1，上周四就出發到華盛頓，準備上周六最後一站對華盛頓聯隊，但喺芝加哥轉機時遇着行雷閃電搞到航機延誤，樸茅大軍滯留機場，冇覺好瞓，足足用咗27個鐘，先由艾蒙頓到達華盛頓；結果大軍呢3日冇練過波，同只可舒服瞓得4個鐘，咁嘅狀態對住美職聯聯賽如火如荼嘅華盛頓聯隊，加上當地攝氏38度高溫，最後10打9輸夠0:4。
樸茅黑仔嘢又點止咁少，年青門將鍾史超活同基比爾都對FC艾蒙頓時嚴重受傷提早回國，鍾史超活更加證實斷腳。轉機華盛頓期間，樸茅大軍又唔見咗14個旅行袋，其中一袋更裝住全隊波衫，結果臨場要問對手借波衫，場比賽先踢得成，慘過o靚仔踢街場。
占士好命等去些路迪
不過樸茅唔係成隊都黑仔，占士就同人唔同命；佢已經約滿樸茅，唔使參加呢次「豬仔團」，又搵到好人家收留，好似蘇超嘅些路迪，對呢位39歲門將仲好有興趣，雙方周一更加會面，睇嚟成事機會仲好高，占士可望跳船去蘇格蘭㖭。
樸茨茅夫黑仔事件簿
1.啟程前往聖地牙哥，因安排失當，足足花了42小時。
2.兩名球員友賽FC艾蒙頓時受傷，門將鍾史超活更斷腳。
3.在芝加哥轉機時遇上閃電，被迫滯留機場。
4.遺失14個旅行袋，包括全隊波衫，要問對手借衫比賽。
5.在攝氏38度高溫下，大敗予華盛頓聯隊0:4。