白鴿黨主席何俊仁噚日到會展，力sell從政40年以來第一本著作，唔少人都到場向佢攞簽名，包括中大學者蔡子強。自稱「50後」嘅仁哥，噚日提到77年發生嘅警方同廉署嘅衝突，指自己當年考到律師牌無耐，聽過有消息指港督麥理浩諗過，用類似鄭耀棠嘅「出兵」橋，出兵平息衝擊廉署嘅警方人員，「佢係諗過出英軍，鎮壓呢班警察」，後來諗清楚至打消念頭，仲退多幾步宣佈特赦。
仁哥指當年大律師公會亦「廢廢哋」，見到港督違憲宣佈特赦聲都唔敢聲，反而佢呢個新丁，就喺雜誌撰文插港督，仲驚動律政署透過雜誌社叫佢「唔好再嘈」，港英政府後來用快速立法補鑊。