民安隊攀山拯救隊上半年出動咗34次，比上年同期20次大幅飆升，佢哋嘅特遣部隊總指揮何偉石話，求助嘅主要係失蹤、迷途、受傷、失足、被困同不適嘅行山者，大部份獨行、過於自信或偏離行山徑。
何偉石話，曾經有個玩越野單車嘅市民喺西貢浪茄灣話體力不支，要求直升機拯救，但佢哋到場發現佢休息後行得走得，仲堅持坐直升機，仲要架名牌單車一齊登機。政府嘅直升機唔係咁用，後來佢知難而退，由民安隊員陪同落山。何偉石話，通常都有10%至20%求助市民經評估後會由人員陪同落山。
政府飛行服務隊直升機長婁穎濤就話，直升機嘅無線電系統可較去聽求助市民嘅手電，再透過對方手機傳出嘅直升機螺旋槳聲，知道對方位置。