天文台噚日上晝發出酷熱天氣警告，咁熱嘅天氣最啱玩水上活動。喺尖東海旁噚日就有大批外籍同本地划艇健兒，齊齊參加國際龍舟邀請賽，今年仲新增「划浴缸」比賽，大熱天時睇估計有8,000人到場觀賽，都算熱鬧。
3日活動11萬人觀賽
端午節雖然過咗個幾月，但喺旅發局同香港龍舟協會首次合辦嘅「香港龍舟嘉年華」，就仍然有睇頭。當中嘅國際龍舟邀請賽係相隔5年後再辦，由沙田城門河搬到尖東對開嘅維港舉行，總共有近200支、嚟自12個國家地區嘅隊伍參加，係歷年最多。
除咗賽龍舟之外，今年仲增設「划浴缸」大賽，兩人一組，鬥快完成100米賽事，當中有兩場專為傳媒而設，分別由來自菲律賓嘅「DailyInquirer」同埋深圳電視台奪冠。
本地傳媒噚日都有參賽，喺中午嘅龍舟賽事，香港寬頻同埋無綫電視fight低韓國同澳洲等地嘅其他隊伍，分別贏得冠軍同亞軍。
大會估計，由上星期五起嘅一連三日活動相當旺丁，總共吸引超過11萬人參觀。