趁住放暑假，一班金融界有心人近日搞咗個論壇，同班高中生、大學生開交流會，分享吓自己對年輕人嘅睇法同經驗。對於時下80後畀人印象唔多捱得，嬌生慣養，財經事務局局長陳家強同埋香港總商會主席胡定旭，就有獨到嘅分析。
陳家強教仔好有辦法，佢話個仔讀中學，最近剛啱放暑假，就已經畀佢去咖啡屋賣咖啡，晨早6點半就要到咖啡屋抹枱倒垃圾，等個仔有啲生活體驗，知道每個人都有唔同嘅崗位同埋貢獻。陳局長又直指時下年輕人嘅弱點就係太過群體、冇個性、鍾意一窩蜂做嘢，同埋唔夠固執咁話。
至於做會計出身、曾任安永香港及中國區主席嘅胡定旭就話，早20年前，好多父母搵仔女入佢間會計師行做實習，呢班父母就會同佢講，要畀個仔做嘢有咁辛苦得咁辛苦，等個仔知道搵錢係幾咁艱難。但今時唔同往日，家嘅父母會打電話嚟問，「7點鐘喇喎，點解仲未畀我個仔放工呀？」所以都唔怪得啲人話家陣啲後生仔唔捱得苦，其實做父母嘅，分分鐘係幫兇。
李華華
mailto:[email protected]