詠春師妹與新馬5系　穩打穩紮

十七歲女有靚樣有長腿，識煮餸耍詠春，文武雙全迷死宅男！這位《葉問前傳》小師妹陳嘉桓話坐車要夠伸腳，借來寶馬新5系550i做拍檔，女神加戰車，有齊男人的夢。

記者：徐影龍
攝影：伍慶泉
鳴謝：BMWHK

車廂闊夠伸長腿

第一眼見陳嘉桓Rose，長長頭髮高高瘦瘦，着住短裙斯斯文文，好難想像她竟能捱苦，學楊紫瓊行打女路線。其實Rose出身於Model界，擺Pose功架十足，一埋位已擺出幾十款迷人姿勢，走入寶馬全新5系最豪級數的550i，看她左挨右瞓，真的好Buy個車內櫳，「我覺得座椅好軟熟舒服，㩒下個掣就可調校角度，車行得快時隔音好好，最啱攤唞聽歌同睇碟Relax吓。最重要係夠闊落，我對腳咁長坐車都幾辛苦，呢架車唔頂頭唔頂腳，令我感覺自在。」當然啦！全新5系用上最高級別的7系底盤，軸距有2,968mm長，就算5個高妹坐晒上車都有大把位剩。

■5系大改款，低斜車首及頭唇加網欄，觀感上比舊款更Sporty。

■550i專屬18吋風扇式輪圈，拍埋小師妹度登時矮一截。

■方形雙出式尾喉亦是550i獨有，令車尾一樣有型有格。

■Rose好欣賞550i又快又穩定，大車不一定論論盡盡。

踩油狂飆夠穩定

耍完詠春做完訪問，用架BMW550i送Rose返觀塘。小男人心態，踩深油門爆飛一段，諗住攞番個尾彩，點知小師妹邊有咁易被拋窒，「咁大架車都幾穩定幾快喎，應該有幾百匹。」識嘢！550i用上最新TwinPowerTurbo引擎，馬力達407匹，扭力峯值來得快Keep得耐，千零轉已經有料到，加埋8速+/-波箱，上上落落反應迅速。今日的兩位主角，共通點可算是底子穩紮兼文武雙全，夠晒合拍呢！