伊健同小春標籤就係古惑仔！事隔多年，《飛砂風中轉》令呢個組合再翻兜，作為80後主流電影，殺人放火繼續上演，但為嘅係從良、進修、上大學！內容充滿黑色幽默，搭上藍光7.1聲道，聲畫效果合格有餘。
記者：陳國輝
坐館無人問津
以前要打餐死先爭到嘅「和義盛」龍頭坐館，家點解送都無人吼？原來當今社會追求文明和諧，各階層奉行經濟至上主義，如行咗十幾年蠱惑嘅火腩（陳小春），佢就決定放低把開山刀，轉用菜刀，開餐館，一償多年宿願；另一邊廂，剛獲釋嘅燕子文（鄭伊健）亦打算潛心進修，報考HKU，當個經濟學人。只可惜時不我與，兩幫派背後各懷鬼胎，誓要搶奪坐館之位，結果兩兄弟又焗住要鬥個你死我活。
現代古惑仔騎呢招
突轉Channel玩懷舊
以Blu-ray質素嚟講，就算比較同類型港產電影，《飛》片仍然令人失望。戲內出現好多暗黑場口，例如行人隧道、黑夜街道，或熄晒燈嘅房仔；無錯，畫面勉強清晰，亦有啲層次感，可惜雜訊非常嚴重！就好似隧道內廝殺一幕，除咗演員臉上有足夠燈光，畫面靚仔OK外，四周環境稍為暗黑，就馬上Noise密佈，細緻位近乎無晒！
值得一讚係，某啲場口經過導演精心安排，藉此交代不同時空。例如講到伊健同小春細個嘅經歷，就會採用懷舊方式處理，畫面稍為變黃，而且畫質刻意鬆濛，似睇粵語長片嘅感覺，但當然，喜歡與否，好睇個人口味。
7.1聲道聽群毆飛凳
刀光劍影呢類拍攝場面，導演似乎唔多Like！好似第一幕隧道開片為例，它僅以一段音樂、小量CG，加幾個定格鏡頭就交代了事，合唔合心意可謂因人而異；但如果你想追求刀來刀往嘅音響效果，極力推介伊健單揪百人一幕！一張鐵凳、硬擋百刀，係就係誇張咗啲，但係當鐵櫈與開山刀撞擊造成嘅爆音，加埋聲音跟住鏡頭同步旋轉嘅效果，呢一刻Surround就出晒嚟！再者，套戲入面某些細緻位，亦加入小量音效元素。唯一要彈，只係配音有少少唔夾嘴形，仲要無分左右喇叭聲㖭，抵打！
Profile
片長：95分鐘
語言：粵語、國語
畫面：1.85:1
聲音：DolbyDTS-HDMasterAudio7.1、5.1
字幕：繁、簡、英
特別收錄：預告、龍尾棍製作特輯、刪剪片段
