【香港書展2010之正面對決】兩位頂級o靚模周秀娜及Angelababy（楊穎），昨日不約而同於下午3時在尖沙嘴舉行寫真簽名會，場地只相隔一條街，周秀娜笑言似蠱惑仔爭地盤，Baby卻揚言不把周秀娜當競爭對手，似乎不把這個宿敵放在眼內。Baby的簽名會進行順利，周秀娜則一波三折，宣傳車遭警察抄牌驅趕，又被嫌她阻路的路人大罵：「你阻住我呀，阿姑！」還殺出個傅穎質疑她賣出17,000本寫真言過其實，認真黑仔。
周秀娜和Angelababy昨午齊齊踩入尖沙嘴，Baby於3時現身海港城，為300名fans簽名，更獲一黑一白的外籍保鑣護駕，氣勢如女王出巡。被問到會否到書展踩場宣傳寫真時，她說：「冇時間，我知道銷情唔錯，呢幾日我搵緊錢，噚日喺香港拍完廣告，聽日又要去日本，唔使宣傳都好好，會加印。」
Baby：我又唔係佢Fans
被問到寫真銷量時，Baby語帶雙關地說：「未知發行數字，唔想作大，做大新聞，上年我都賣咗三萬幾本，今年中國、香港、台灣同日本首個定單都超過三萬。」宿敵周秀娜於一街之隔搞簽名會，會否是最大競爭對手？她說：「冇當佢係競爭對手，冇心同人爭，唔係唔尊重佢，係想做好自己。」周秀娜送bra回饋讀者，Baby有何對策？她笑言：「我又唔係佢fans，又唔係男人，點知？我就會捐錢去慈善機構，我本書叫《Paradise》，好似天堂福音咁同人分享，最少都會捐收益10%回饋社會，fans都會開心。」
外間有指Baby的寫真造型抄襲日本名模梨花的寫真集，Baby昨日提起時顯得有點不悅，她說：「一定冇可能，佢嗰本我有睇過，封面都唔一樣，戴皇冠造型我第一本寫真已用過，寫嗰個無聊。」Baby又謂會叫男友黃曉明買寫真支持，對於有指黃曉明也曾整容，她即撐男友說：「佢完全冇變過，係啲舊相同造型問題。」至於傳男友推薦她一起參演籃球名將魔術手莊遜的新戲《神奇》，Baby說：「未知，我睇緊好多劇本。」
周秀娜阻街被怒罵阿姑
另一方面，周秀娜的宣傳車昨午3時停泊在一街之隔的海防道新港中心對出位置，吸引百多名fans聚集，加上約20名記者，行人路完全被堵塞，有警員到場了解，其間周秀娜懶理並站在車前拍照，一名逾40歲男士怒氣冲冲硬要在周秀娜面前走過，並罵道：「你阻住我呀，阿姑。」周秀娜發揮EQ繼續微笑，該男士走過後即向警察投訴，結果宣傳車被抄牌，違例泊車罰款320元，並要即時駛走，周秀娜的簽名會只好移師至九龍公園徑的兒童遊樂場舉行。
周秀娜步行往遊樂場時，大班fans尾隨造成長長人龍，有路人見狀也停下拍照。到達後周秀娜坐在鞦韆上為200名fans簽名。事後被問到遭罵「阿姑」一事時，周秀娜說聽不到，又謂：「香港地地方細啲，但都有好多路可以行，唔一定要呢個位置，如果真係造成不便，好對唔住。」被留難會否感尷尬？周秀娜說：「唔會，只要見到fans，其他嘢影響唔到我。」被驅趕是否很狼狽？她謂：「幾得意呀，第一次坐鞦韆簽名，以前都係喺有冷氣地方搞，家感受到fans嘅辛苦。」
「有啲似蠱惑仔爭地盤」
談到Baby與她同日同時同區辦簽名會對撼，周秀娜說：「有啲似蠱惑仔爭地盤，最緊要各有各支持者，大家都好。」至於Baby寫真被指抄襲，她說：「我冇睇過，最緊要影得靚啫。」書展文化顧問成員伍曼儀指o靚模寫真意淫，周秀娜說：「唔同人心中嘅書展文化都唔同，無論乜嘢都好，有人鍾意我就得，清楚自己做乜就得，我唔覺得自己本寫真意淫。」對於傅穎指今年書展銷情差，又指周秀娜賣逾萬本應該是包括其他地方，周秀娜說：「我係聽出版商講嘅。」其助手則指單是書展已賣17,000本，全部銷量則有20,000多本。可會拿出證據證明？周秀娜說：「遲啲你哋見我買樓咪知囉。」
採訪、攝影：卓寶花、顏英儀、胡比