周國賢（Endy）讀書時已開始研究攝影，06年獲父親送贈一部相機後，更是「泥足深陷」，並拍下不少外遊時的照片。Endy目前擁有最貴的一部相機是價值30,000多元的NikonD3，他認為貴價相機更易捕捉到珍貴的時刻，拍照時更加手到拿來。現時Endy最想將自己的兩個專長——攝影及繪畫作品結集成一本書，以表達自己心中所想，當然他也想舉行個人攝影展。 撰文：李珮洳
「呢張相係喺韓國釜山街頭影嘅，嗰度係一個舊少少嘅地方，成條街有好多電燈線，感覺好vintage，夠凌亂。」
「去日本拍節目時遇上當地一年一度嘅夏天祭典，成條街都掛滿紅燈籠，好靚。」
「又係喺日本拍嘢時影嘅，當時係夏天，我哋去咗一條溪，上邊有好多蜻蜓，我咁啱帶咗支長鏡，捕捉到呢個moment。影到呢張相之後，我覺得自己升咗呢。」
「呢個係日本東北一個蘋果園，嗰度盛產青蘋果汁，嗰日好好天，我發覺日本青蘋果嘅青色，同香港嗰啲好唔同，真係青好多，呢個青色配合埋個天嘅顏色好靚。」
「日本夏天祭典，我喺天台等埋位時影落去，咁大個仔都係第一次見到呢啲盛會，個構圖好靚。」
「兩年前去日本拍節目，喺飛機上見到個奇景，就係上邊烏雲密佈，下邊就萬里無雲，其實親眼見到都幾恐怖。」
「喺韓國街邊周圍都可以見到蒲公英，呢種植物其實好靚，只係大家平時冇仔細去欣賞佢。」
「呢條係韓國釜山最出名嘅橋廣安大橋，個海叫廣安里，係非常出名嘅旅遊地點，我有一日瞓唔着，朝早六點走落去影咗幾張相。」
