天文台前幾日掛出今年第一個三號風球，表明星期四「天光前不會改發八號風球」，好多打工仔一聽就明，即係話要準時起身返工。以前天文台發出呢啲颱風消息，習慣用「凌晨」、「清晨」字眼，有市民認為說法含糊，實際上即係甚麼時間呢？前台長林超英為呢啲批評引經據典，指「凌晨」、「清晨」有明確定義，堅持沿用。新台長李本瀅搞搞新意思，據講內部討論後，認為天氣報告、預測應該以民為本，最重要都係市民得到明確訊息，應該避免再用凌晨、清晨呢啲被指唔清楚字眼，改用「天光前」直接易明，所以日後會改變用字，希望市民一聽就明。