澳門賭場林立，幾年前聘請唔少香港人過大海去打工，近年冇咁好景，香港人逐漸回流，八方日前發現，澳門又向港人招手嘞。
澳門社會工作局日前喺香港報章刊登廣告，聘請三個臨床心理學家，強調有治療賭博成癮經驗者可獲優先考慮。要向香港挖角處理賭癮問題，莫非澳門人越來越爛賭？澳門心理治療協會會長劉秉權同八方講，澳門社工局一向有心理學家處理賭博成癮問題，呢次招請三個專家，相信係想擴充服務，至於係咪賭徒多咗或者問題賭博越來越嚴重，佢話暫未見到咁嘅情況。
薪金一般超過二萬
社工局無說明心理學家薪酬，只係話視乎學歷同工作經驗而定，據知呢個職位入職薪金一般超過二萬元，對香港心理學家有冇吸引力呢？行內人話見仁見智。劉秉權則指澳、港社會環境好接近，香港人到澳門做心理治療工作應該冇乜難度，唯一唔同係要睇埋土生葡人。佢又話澳門心理學家多數喺大學、醫院工作，社工局要增聘人手，自然要請外援。