【泰國直擊】彭發執導嘅電影《索命童話》喺泰國取景,早排因為泰國紅衫軍示威而搞亂咗個進度,不過家終於煞科,噚日仲招待咗一班記者去當地探班。片中大部份演員包括劉青雲、江若琳(Elanne)、拍過電影《火龍》嘅內地演員王寶強同萬綺雯等都在場。
之前拍攝嘅時候試過工作人員集體眼睛發炎,唔知係咪因為咁,為咗心安理得,開工前特登搵法師主持咗個儀式。青雲接受訪問時話所謂嘅怪事,都係可以解釋嘅,佢話:「可能因為嗰日日頭曬完太陽,夜晚又要用紫外光燈再拍先至有事。」佢話之後大家睇咗醫生就冇事。
江若琳精神分裂
青雲話會扮演一個不負責任嘅警察,佢話:「呢部係懸疑片,我個角色比較簡單,反而Elanne嘅角色比較複雜,做一個有暴力傾向嘅自閉病人。」Elanne就話全套戲佢一句對白都冇,演起嚟都幾有難度:「個角色同我啱啱幫無綫拍嘅劇集《洪武三十二》好唔同,搞到個人精神有啲分裂。」Elanne話完成拍攝後會同公司攞半個月假,以平復自己嘅情緒喎。