書展禁絕o靚模,卻禁不了「o靚毛」。着得多衫過o靚模嘅長毛,因此獲准星期日喺書展為相集《RED》擺檔簽名。處男寫真集有逾200張長毛出道搞社運至今「肉照」,等大家睇睇「o靚毛」歲月。據聞書商已經將長毛搔首弄姿同肉體橫陳「艷照」收起,以免同o靚模搶食。
長毛向來女人緣甚佳,相集中亦有唔少與女伴嘅合照,至於相中人是誰,長毛不置可否,只係叫大家「你自己諗啦」,好似有啲嘢咁噃。
社民連主席陶君行應該冇長毛咁多女伴,有個好老婆孔令瑜,可惜黨主席夫人不允將情史公諸於世,所以阿陶新書《抗戰二十年》冇愛情線。
阿陶話新書會爆料當年退出民主黨內幕,偏偏「唔記得」寫下當時華叔勸佢留低嘅一席話,例如指示阿陶「種票」,搵多啲人入民主黨伺機踢走匯點系嘅秘聞。