在娛樂圈打滾16年的陳山聰，早前因為出動私伙潮服拍劇而令人注目，連帶其感情生活亦受關注，山聰表示與拍拖多年的設計師女友有共識，現階段把握在無綫跑出微微的第一步，不過婚後仍會享受二人世界，買衫旅行最開心，堅守「BB可以唔要，衫唔可以唔買」的原則。
提到被踢爆有拍拖多年的設計師女朋友，陳山聰笑說：「估唔到咁都會穿煲，其實我哋成日去嗰度行街食飯睇戲，只不過係次次都影唔到。」問到結婚的問題，他說：「連我阿媽都話同居咪得囉，使乜鬼結婚呀！雖然我哋一齊都咁耐，可以話走唔甩，結婚只係一個儀式，不過點都要有個交代，到時一定會通知大家，但係唔會短期內發生，我家叫喺TVB踏出微微嘅第一步，所以都想把握機會發展吓自己嘅事業。」
阿哥開枝散葉
講到生BB，山聰用好肯定的語氣說：「絕對唔會生仔，一來佢唔鍾意細路仔，二來我哋兩個都鍾意周圍去旅行，如果有小朋友嘅話唔係咁方便，而且我又未搵夠錢。」
有記者取笑他似乎因為「BB可以唔要，但衫唔可以唔買」這原因？山聰笑說：「都可以咁講，買衫係我嘅興趣，唔可以唔買，不過主要係我啲阿哥同家姐個個都生晒仔女，變咗我冇生仔嘅壓力同需要。」
蘇英俊多發揮
提及山聰近期的曝光率越來越高，新劇幾乎一部接一部推出，山聰笑說：「都係咁啱得咁蹺，好似《施公奇案2》已經拍咗兩年，我自己就好鍾意呢部劇，因為蘇英俊呢個角色可以話係我回歸TVB之後，比較多戲演嘅角色，所以我好期待呢部劇。」
採訪：何慧斯
攝影：林德雄
場地提供：HAIR（又一城）
化妝：RaymondYip