求驗客手記:好波拿度 被迫攬女 - 求驗客

求驗客手記:好波拿度 被迫攬女 - 求驗客

颱風「燦哥」遠離香港,不過就繼續為香港帶來狂風暴雨,令到一心諗住喺星期六、日假期去海灘嘅陽光球迷,都要暫時同陽光講ByeBye,之但係身在地中海福門特拉島嘅網壇「1哥」拿度就唔同喇,喺當地享受緊陽光與海灘,興奮到踢波show球技,仲要被迫攬女影相,認真識嘆!

踢沙灘波show腳法

贏咗法網、溫網男單冠軍嘅24歲西班牙球手拿度,之前去完南非睇世界盃決賽,兼攞住大力神盃興奮影相,之後返咗家鄉馬略卡稍事休息,就去咗地中海嘅福門特拉島繼續嘆世界。拿度着住近似孖煙囪短褲,半裸咁瞓喺沙灘椅,一臉輕鬆咁享受難得嘅假期。

三點式女郎起哄狂影

點知拿度嘆完一陣之後,就即時波癮大發,拎住個七彩沙灘波喺海邊大show佢嘅腳法,曾經講過話如果唔係打網球,一定做職業足球員嘅皇馬fans拿度,腳法又真係幾有水準,個波踢高踢低,完全玩弄於佢嘅「腳掌之下」。喺猛烈陽光照耀之下,將拿度擁有嘅一身強壯肌肉展露無遺。
之不過佢咁樣show球技、肌肉,當然吸引到喺沙灘度曬太陽嘅群眾,紛紛去搵拿度影相,而且搵拿度攞簽名嘅個個都係着住三點式嘅女仔,班女球迷靚唔靚,我求大俠就唔評論,不過一向親民嘅拿度咁樣有求必應,喺沙灘椅度起身影相,亦都要被迫攬女,咁好嘅球星實在係難能可貴!