花旗股市前晚早段窄幅橫行，不過股民之後聽見伯南克喺國會話經濟異常地不明朗，啲沽盤就湧出推低股市，道指最後唔見咗109點，守住喺10100邊緣。
港股呢兩日技術走勢有改善，內地股市又偏好，噚日並無受花旗股市影響，恒指反覆升上全日高水平收市，報收20589，貼住條100日線，睇個勢可以試關，破20722睇20860。滙控（005）伺機試77元，破位睇81.50元，係後市去向嘅關鍵。
農行C輪23569：農業銀行（1288）昨收3.30元，升2.4%。上市幾日冇乜睇頭，原來一直有間花旗大基金密密吸貨，消息一出，股價生猛，成交顯著增加，第一波炒作睇3.60元，可以諗吓隻C輪23569。隻輪現價15.2仙，2011年1月17日到期，行使價3.68元，溢價16.1%，引伸波幅30.8%，槓桿率21.7倍（有效7.7倍），正股升上3.60元，23569睇28.1仙，有近85%升幅，正股跌穿3.20元就沽咗隻輪。
俊樺