死無葬身之地嘅問題越鬧越大，煲呔自己諗唔掂，發老爛攞區議會嚟祭旗，點名狂砌沙田區議會，要區議會主席韋國洪自己嘔塊地皮出嚟。區議員噚日開會創意無限，公民力量何厚祥率先建議喺馬場地底起骨灰龕，「春秋二祭去嗰度應該幾受馬迷歡迎。」
佢嘅creativity隨即得到同僚認同，鄧永昌就建議最好在巿區搵地方，維園或九龍公園地下最fit，「用地下鐵路嘅方式經營，地下嘅世界都係多姿多采o架，冬暖夏凉，最緊要講明唔使化寶啫，學副局長話齋移風易俗吖嘛，成個工業邨咁起就最好。」
用先人活化迪士尼
大家腦震盪得好起勁，羅光強提議喺中大宿舍都起，「整得靚靚哋，無所謂o架；大浪西灣都好o架，家鏟晒啲樹，我哋去叫魯生捐出嚟，起個豪華式骨灰龕，包保全港巿民同環保團體好贊成。」本身做善終顧問嘅梁永雄最有商業頭腦，直情諗住用先人嚟活化迪士尼，「橫掂都蝕錢o架啦，政府有股份o架嘛，交通配套又好，起個全世界最豪華嘅出嚟，做埋景點」。唔知呢啲ideas，煲呔覺得O唔OK呢？