聲言如果最低工資定於時薪33元，就要發盈警嘅快餐集團大家樂主席陳裕光，去年又加人工，年薪999.1萬元，較對上一年多29.6萬元。大家樂最新年報披露管理層薪酬，四個執行董事中，僅陳裕光加人工，佢底薪象徵式減1,000蚊，花紅卻大增117.4萬元，其他執行董事花紅有加有減，羅碧靈少咗92,000蚊。
時薪廿幾三十蚊嘅打工仔，唔知做幾多個鐘頭先有成千萬元收入，陳裕光擔心最低工資水平超過30蚊，向股東先旨聲明可能要發出盈警，小股東睇到佢年薪近千萬元，唔知會唔會想叫陳裕光收少啲「共度時艱」？
年薪千萬元主席對基層員工薪金好手緊，對非執董比較疏爽，大家樂三個非執董去年袍金位位增加30,000元至80,000元，獨立非執行董事袍金更大幅增加一倍至20萬元。公司搵到錢，董事當然有福同享啦。