一班o靚模無懼貿發局封殺，踩入書展見粉絲；反觀堂堂一個特區行政長官，卻因行程曝光而甩底不敢去書展，傳媒白等，一眾滿心歡喜以為特首來打氣嘅書商空歡喜一場。
噚日下晝4點幾，八方收到消息指煲呔5點鐘左右逛書展，一眾記者即時埋位等佢現身，其間仲見到疑似G4人員巡視場地，點知等咗成個鐘頭都唔見煲呔影蹤。
有書商透露，噚日下午獲貿發局通知，指煲呔會到場參觀電子書，後來5點幾鐘貿發局再通知大家特首取消行程，原因冇講，估計可能係黑雨淋熄雅興，或者係不滿行程曝光而甩底。今年初煲呔在洪水橋茶餐廳訂咗枱嘆奶茶，俾傳媒知道後突然noshow，佢放飛機早有前科。