古天樂近年成為票房靈藥兼吸金王，昨日喜上加喜成為威士忌品牌的代言人，真係飲得杯落。古仔主演的《鎗王之王》在內地票房過億，問他會否加片酬賀一賀，他反表示自己順德人，片酬有升有降，更會願意為低成本電影減價。
古天樂風塵僕僕，本在內地拍攝杜琪峯電影的他，昨日冒着黑色暴雨姍姍來遲，遲了45分鐘到中環ifc出席蘇格蘭威士忌品牌Matisse代言活動，他更獲大會送贈1972年的佳釀，古仔即場回禮豪乾兩杯威士忌，認真識做。
飲醉酒只會瞓覺
問古仔酒量，他說：「細個媽咪教我飲酒，自己放假先飲酒，試過有人教拍緊張情節電影時，飲酒可以減壓，我反而仲緊張，自己飲醉酒唔會出聲，只會瞓覺。」
古仔憑着《鎗王之王》再度成為內地過億票房男星，他十分高興地說：「好開心，導演都話唔係大路商業片，收過億好好成績。」問他會否借勢加片酬，他說：「片酬不嬲有加有減，冇咁主角咪減啲，如果低成本電影，都會願意減。」
談到貌似他的黃曉明近日被指「變臉」，古仔說：「人哋嘅事冇辦法回應，黃曉明係一個好有潛質嘅演員，同佢合作過廣告同電影，佢係一個好有思想嘅演員。」
採訪、攝影：JessicaNgan