由《壹號皇庭》金牌監製鄧特希親自操刀嘅亞視劇集《法網群英》會喺下周一（26日）播映，不過呢齣拍畢經年嘅劇集喺開播前就是非纏身，由於鄧特希同一班幕後工作人員因涉及勞資糾紛而鬧上法庭，前日班工作人員仲搵咗公民黨大狀陳淑莊幫手追數，搞到套劇有機會被申請禁制播出。
劇中演員吳啟華、張文慈、陳啟泰等聯同鄧特希噚日到九龍灣MCL戲院，出席《法》劇首映禮，眾人未有受事件影響心情，不過被拖10萬尾數嘅林雪就冇出現。
鄧特希少講為妙
鄧特希噚日現身時就被追問拖數新聞，但佢就以交咗畀法庭處理為由而唔方便多言作答，佢仲話以常識角度嚟睇，唔相信會有禁播情況發生，佢話：「其實家審訊係有幾個部份，有啲係涉及高院，因為有人將啲錢攞走晒。」鄧特希承認事件對佢信譽有影響，所以佢都想等法庭盡快判決。
至於同場嘅吳啟華就力撐鄧特希為人，都覺得有人中飽私囊係不法行為，雖然佢之前已收足合約列明嘅酬勞，但係仍有近6位數嘅補水酬金未收，佢話收唔足錢嘅情況以前都試過，特別係補水就一定有。陳啟泰同張文慈都話收足酬勞，陳啟泰仲得戚話收多酬勞㖭，佢話：「原本簽咗30集，家多咗5集，由60個騷變咗70個騷，我喺離開亞視半年後，分三次收晒啲錢。」