作反嘞！公社兩黨漠視阿爺命令舉行違憲公投運動，話口未完，今次竟然輪到澳門起義，崔世安宣誓就任僅七個幾月，佢「笨忍」就急不及待起錨舉行一個公投運動，由全澳居民公投中央送畀澳門一對大熊貓叫乜嘢名，一人一票選擇國寶名字。
為慶祝澳門回歸10周年，中央送出一對雌雄大熊貓畀澳門，澳門政府舉辦公投為大熊貓命名。按照北京護法權威說法，香港同澳門《基本法》都冇條文容許公投，由於冇寫就唔做得，八方有理由相信呢次公投違法違憲，係針對中央、背叛全國人民，將澳門從祖國領土分裂出去嘅澳獨陰謀！
澳門唔係主權國家，「笨忍」又獲得中央領導人信任，肩負全國人民澳人治澳嘅偉大期望，點解夠膽與中央對着幹呢？八方參詳再三，發現魔鬼果然是在細節之中。澳門官方搞公投，係有中國特色嘅公投。
先篩選後投票似選特首
原來澳門早前舉行咗一個徵名比賽，總共收到近4,000個提名，呢幾千個名，先經一個由「笨忍」欽點嘅七人委員會篩選，揀出五對名字，分別為第一對：開開、心心；第二對：濠濠、蓮蓮；第三對：陽光、滿滿；第四對：澳祥、澳妙；第五對：阿濠、蓮妹。
通過呢個「提名」門檻，上述五對名字先至合資格候選，由澳門人公投。呢個選舉程序，同香港、澳門特首選舉十分相似；與民主黨提出，北京欣然接納嘅區議會方案比較，更有異曲同工之妙。有學者認為，澳門呢個公投國寶名字選舉辦法，雖然有提名門檻，但基本上由一人一票選出國寶名字，符合普及而平等原則，具體而實質上增加了國寶命名民主成份，由量變而質變，由局部民主推至全面民主，支持呢個選舉辦法，並不代表放棄了長遠民主理想和目標。
有學者又認為，澳門公投大熊貓名字，係民主向前走重要一步，因為香港兩對大熊貓安安、佳佳，盈盈、樂樂，市民只有提名權，名字一概由官方欽定小圈子委員會拍板，命名辦法原地踏步，澳門人有得揀，咁先至好玩。
mailto:[email protected]