世界盃過後，好多人熱情未冷，夢想或幻想中國有一日主辦世界盃。照理，中國係十三億人大國，人哋小國寡民，如丹麥、斯洛伐克、斯洛文尼亞都可以參加世界盃，呢三個國家嘅人民數目，加埋仲可能少過上海，點解可以選出六十九名球員踢世界盃，而中國搵十一個都搵唔到呀？歐洲人能，中國為甚麼不能？於是中國足協掌門人韋迪去完南非睇世界盃之後，愛國情操大增特增，聲言我們應該讓中國人在自己家門口看一次世界盃，話要申辦二○二六年或以後嘅世界盃。
點知官方新華社一啲都唔畀面，話明中國辦世界盃有「三難一不可能」：（一）世界盃難有經濟效益，（二）世界盃難以振奮人心，中國隊在家門口慘敗連場，更會打擊民心，（三）世界盃難以促進中國旅遊餐飲業，（四）世界盃不可能提高中國足球水準，二○○七年女子足球世界盃在中國舉行，對女子足球完全沒有促進作用。
十劃未有一撇啫，新華社已經潑冷水，顯然係中央唔想韋迪得個講字，掛住發夢。睇吓韋掌門嘅「變法維新」，又幾似發夢喎，例如佢話要摒棄以「聯賽為本」，着力提高國家隊水平，請問球員如果唔踢聯賽，點樣可以培養比賽經驗與技術呀？哦，選全國精英球員三四十名，日操夜操，專踢國際賽，唔踢聯賽呀？球員悶都悶死啦，如果有球員受傷，長期休養，是不是又從聯賽中拔尖，選入國家隊，以後呢啲尖子與聯賽無緣呢？呢啲咁笨嘅方法，全世界係中國足協負責人先至諗得出。如果以國足隊名義參加聯賽，譬喻英格蘭國家隊踢英超，國家隊中球員嘅人工點樣計？
韋迪見到西班牙贏得世界盃，中國足協明令全面學習西班牙（以前話學習巴薩），加強同西班牙足球交流。如何交流法？據知西班牙有近二萬個國際足協教練牌照，全世界最多，不如搵三四十個到中國做各球會及青訓學校教練，學得二十年，怕且有小成啩。但講嚟講去，都未話要着力嚴打假波，打黑哨，打貪污腐敗，中國足球如何有前途？請奇連士文用重建德國隊嘅方法嚟重建中國隊，恐怕奇連士文也會落荒而逃。