暑期大片《唐山大地震》令好多人流眼淚，如果你係AC米蘭球迷，睇完《AC米蘭大地震》，怕且同樣會一殼眼淚。紅黑兵團前日開操，個癲狂總理班主貝盧斯科尼高調坐直升機到場、高調話唔會賣盤、高調教新教練艾基利排陣、高調話朗拿甸奴值1億歐元，可惜瓣瓣高時出手就低，喺佢閂水喉情況下引入嘅全屬3、4流貨色，AC唔能夠逃離「老細足球」魔掌，大難臨頭……
「老細足球」教新帥排陣
因為近年連串桃色醜聞，換嚟老淫蟲污名嘅貝老，前日喺球會開操時亮相訓練場。佢近年對球會有破壞冇建設，又唔肯開水喉，令球迷不滿，所以當日有接近3千人喺訓練場抗議，要求佢下台。你有你抗議，貝老照樣大談新一年大計，而一開腔就下指令教新帥艾基利點排陣：「我唔想再見到單箭頭，我要兩個前鋒。上季李安納度將柏圖擺喺邊線唔係計，搞到佢吓吓要扭過3至4個防守球員，都唔知為乜。」
狂吹細哨值1億歐元
佢又提到「細哨」絕對唔只值傳媒所講嘅1,000萬歐元，應該係10倍：「睇佢一個人都值回票價啦。」我求大俠同意「細哨」仲好有價值，但今時今日去到1億歐元未免誇張。講開新教練，好多人根本唔知艾基利係乜水，我求大俠提醒大家，佢咪係前季帶領卡利亞里排第9，到今年4月被卡軍解僱嗰位仁兄。咁嘅履歷，點信得過？
AC新兵名單計有連國家隊第3號門將地位都保唔住嘅艾米利亞、已經34歲嘅耶比斯，仲有啱啱由熱拿亞加盟，上個月至踢完世界盃嘅希臘國腳後衞柏柏斯達夫普路斯等等。換轉AC盛世，呢啲球員唔使旨意成為紅黑兵團成員。有入必有出，好幾位名將據報隨時離隊，包括加度素、踢完世盃仲未歸隊嘅亨特拉爾。總之，橫睇掂睇AC都唔似走向復興之路，而係沒落之路。