弘海（065）宣佈洽購新煤礦，昨日復牌，股價不升反跌，相信同個deal「有排傾」有關。弘海昨高開1.85元，但一度跌到1.55元，尾市轉穩，收1.67元，仍跌0.16元。
不過，睇真個deal，一傾掂，成間弘海可以脫胎換骨，而股價亦好大機會倍升。呢單收購，有兩點要特別留意，一係煤礦嘅「晒士」，好大；二係拍住收購嘅合作夥伴，來頭好勁。
先講個礦。目標公司持有位於蒙古的Shivee-Ovoo（SO）褐煤礦藏7份勘探許可證，煤礦總面積77410頃，估計許可區內合併資源為21.44億噸。弘海目前在內蒙古的煤礦資源量8700多萬噸，SO嘅晒士成24倍咁大。
根據現時報告，假設SO經推斷礦產資源約有10%，即有2.14億噸，按現時低發熱量4800大卡氣煤每噸坑口價280元計，潛在價值達600億元。當地政府在SO煤礦附近已開採一個露天煤礦，供應烏蘭巴托電廠所需。
合作夥伴背景強勁
開礦首要解決交通運輸，SO剛好位於中俄鐵路（蒙古橫貫鐵路）沿線，鐵路貫穿該區中央。同時，根據有關「中蒙能源合作──電力開發及跨境輸電項目」的若干公開資料，蒙古及中國政府計劃在目標公司許可區附近若干政府土地上興建新電廠，以發電並輸往中國。運輸既不成問題，本地又會有大買家，SO的優勢盡顯。
講到合作收購嘅夥伴，就係中國光彩集團（ChinaGuangcaiGroup），一家主要從事能源開發及基建項目投資的公司，業務多元化，分支企業遍及全國20多個省市，擁有員工上萬人。光彩點勁？佢同俄羅斯電網集團簽約，幫俄羅斯改造電網項目，計劃8至10年完成，涉及設備金額高達1000億美元。中俄雙方同意，中方銀行以出口信貸融資，予俄方採購中國電力設備，然後俄方以石油資源償還貸款。光彩所做的真正係政府級層次的大deal，弘海拍住佢，聲價亦大為提升。
4月26日，推介弘海（1.29元），其後升上1.88元，6月4日1.66元加碼，近日升上1.85元；現時1.67元又可再上車，今次目標係2.20元。
郭兆誠