特首曾蔭權公開批評地區人士各家自掃門前雪，反對任何不受歡迎公共設施在自己社區興建。有處理地區事務的官員不諱言，政府要在社區建公屋及其他對社區有影響的設施，基本上已到了寸步難行的地步，區議員為求保住議席，會想盡辦法阻止這些設施進入本身選區。
該官員稱，不要說骨灰龕這類厭惡性設施，就算公屋，政府要說服區議員接受在其選區興建都十分困難，因為區議員為保選票，一定會用盡方法反對，「我聽過一個例子，政府原本搵到一塊地起公屋，點知附近三個區議會選區嘅私人屋苑居民、擔心影響樓價，於是來自三個唔同政黨嘅區議員一齊施壓，逼到政府要放棄」。
只關心選區利益
另一官員則指出，就算某政黨的立法會議員支持某些政策，去到地區議員層面往往是另一回事，他們只關心選區利益，不會將整體社會利益放在大前提，「有個區議員同我講，你講到香港利益點偉大係冇用，佢個選區選民就係唔想有個骨灰龕喺度，到時佢個區議會位輸咗，仲講乜全港利益、社會整體利益」。
本報記者