書展模篇：越禁越撐　多謝貿發局

貿發局這位大家長一聲令下，書展開波模無得晒波，一早講明禁止模在會場內搞簽名會。香港地方之大何處無容身之所？模們索性自己起壇搞個市，忠實Fans當然力撐到底。越禁越旺，多謝貿發局這一道聖旨，萬歲萬萬歲！

記者：葉雪芯
攝影：周旭文、部份相片由被訪者提供

一千Fans做後盾

Carol（楊梓瑤）所屬模特兒公司StarzPeople講明，搞不成簽名會也會照入會場，站在一叠叠寫真集《Huge》旁邊幫手做宣傳。她的Fans成立了1000FansClub，19歲的Vivi是Fans團領導人之一，講到明會撐到底：「我由《美女廚房》開始鍾意Carol，每次有佢出現嘅場合，我哋都會聚埋十幾個Fans去舉牌。人紅、風頭勁就一定有人唔鍾意o架嘞，我覺得Carol無問題喎，影輯相出嚟最緊要靚，我哋一定支持！我哋明白貿發局禁o靚模係情有可原，可能有家長接受唔到啩。」

■Vivi說，每次出席撐場活動的Fans大約有十多人，不過支持Carol人數最多的是龍友，次次都被霸佔了不少好位置。

■Carol的FansClub成立不久，短短幾個月時間已經有一千人，搞手之一Vivi說間中會與Carol聚會，貿發局禁她，依然有強大Fans團做後盾。

畀多程交通費照撐場

半年前，阿儀正式成為DaDa（陳靜）死硬派Fans，由百果園廣告開始留意她，對於今次自己偶像入不得書展之門，她批評貿發局無理：「性感都有好多種，DaDa、Liz、ArYu佢哋一齊拍嗰本寫真集，根本就好清純，唔明點解要將o靚模睇得咁負面囉。諗深一層，就算貿發局禁止o靚模入場搞簽名會，其實都無乜影響，o靚模咪搵其他地方搞活動囉，我哋照舊會撐場嘅。」阿儀朋友Ben和中學生Ken，分別是Liz和ArYu擁躉，他們都是由看Blog開始追星，每次活動例必到場，今次禁止o靚模入書展，他們同樣大罵貿發局：「點解咁保守？一聽到o靚模呢個名就一竹篙打一船人，佢哋本書嘅性感尺度都OK吖！一次過禁晒唔俾所有o靚模搞簽名會好唔公平，可能o靚模當中係有害群之馬，但唔應該一刀切囉！不過入唔到會場都無所謂，又唔係唔俾賣書，反正仲有其他地方可以搞活動，咪去第二個場做宣傳囉，我哋走多一轉，畀多一程交通錢啫。」

■只要DaDa、Liz和ArYu在場，Fans一定到場舉牌支持。

■四眼仔Ben是Liz忠實Fans：「我鍾意Liz個樣夠清純。」

■中學生Ken今年只得15歲，最愛ArYu，血氣方剛學生冧o靚模，正常過正常。

■阿儀：「DaDa好Nice，大家將焦點放喺佢個胸。其實DaDa都唔想行性感路線。」

妄攝是潮物

Debby（曾麗儀）聯同Cat、Kinki等五位o靚模齊齊出妄攝寫真，同樣被禁止在書展搞簽名會，作為Debby忠實Fans的Winnie就指貿發局無聊：「我覺得係歧視啦，只係性感少少啫。成日話o靚模教壞細路，家啲小朋友唔教都壞啦，妄攝喺日本好興，呢啲叫做潮流。」Debby早排放上網當街扮被施暴的片段，弄到滿城風雨，被各界批評敗壞社會風氣，「我都有睇過段片，可能有部份家長接受唔到，我自己唔覺得好粗暴，只係宣傳本寫真，唔係好大問題。」問到她會否到場撐Debby，Winnie就話未必，但書就肯定會照買。