投資一向叻仔嘅高盛周二出咗成績表，估唔到上季盈利大瀉82%，財務總監DavidViniar話公司股票衍生工具部門睇錯市，輸到連公司都話「唔好再提喇」。
高盛首季講到自己戰無不勝，交易員無輸過一毫子，仲話平均每人日賺兩億，點解家搞成咁？華華八到，有客仔要同高盛對賭，估第二季股市波幅會升，高盛做莊但冇做足對冲，搞到輸鑊甘。公司輸錢，梗係要搵人祭旗！有消息話，有關部門高層已經被人叮走，其他員工亦要陸續執包袱。
高盛老貓燒鬚，反映個市的確唔易玩，難怪近排啲對冲產品咁渴市，連「債王」格羅斯旗下PIMCO，都想搞「黑天鵝」保險，只要個市跌超過15%，買咗呢類保險嘅投資者就有得賠。高盛下次又睇唔通個市，不妨幫襯下債王啦！
李華華