股市從來都係英雄塚，成王敗寇乃係市場定律，咁大家仲記唔記得，對冲基金界嘅神話──「老虎基金」呢？
當年呢隻老虎好巴閉，曾經夾埋索羅斯嘅量子基金，喺97亞洲金融風暴嗰陣狙擊港元，最後因為狂沽日圓搞到重傷，加埋千禧科網股熱潮，怪隻老虎太硬頸，過份睇好傳統股份，搞到全軍覆沒，2000年被迫摺埋。
隻老虎嘅揸弗人羅伯遜（JulianRobertson），前排接受《華爾街日報》專訪時竟然話，想重推老虎基金，仲叫孻仔AlexRobertson做基金執行合夥人。擺明車馬要延續老虎神話喎，唔通想喺虎年重振虎威？
事實上，老虎基金近年已化身成幫人推對冲基金嘅經理人，家陣可能會請埋其他投資者或者散戶一齊玩。羅伯遜2000年將基金摺埋嚟做，一直以間接形式投資其他基金，家佢已經係40隻對冲基金嘅股東。因為呢啲基金成立之後會將部份股權畀返羅伯遜，所以又叫「老虎種子」。
老虎基金當年好威水o架，1980年成立嗰陣得800萬美金嘅資產，18年間管理資產膨脹到220億美金，成為全球第二大對冲基金。可惜，羅伯遜一直信奉價值投資法，不屑當年升到嘭嘭聲嘅科技股，投資日圓又損手爛腳；硬頸嘅佢，一直死揸股價插水嘅美國航空，直到美航喺2002年破產嗰陣，佢真係蝕到渣都冇o架！
李華華
mailto:[email protected]