啱啱做咗老竇嘅皇馬前鋒基斯坦奴朗拿度（C朗）媾女新聞不絕，但一直都有傳佢其實係「攣」嘅，佢日前就俾人踢爆同公開承認係同志嘅前美國樂隊NSync成員LanceBass喺紐約撐枱腳，之後一齊去同志派對，玩得非常開心；Lance仲因為有C朗呢個癲倒一眾基民嘅萬人迷相伴而表現陶醉。雖然C朗本人唔認係同志，話好清楚自己嘅性取向，但係空穴來風，未必無因，佢嘅衣着打扮一向基味甚濃，開胸緊身上衫、黑色腳甲油，唔少同志雜誌都投佢做基界標誌，真係唔知戥佢開心定唔開心好。
「模仿」卡斯拿斯
另外，法比加斯近日接受電視台一男主持訪問，期間「法比仔」應男主持要求同佢「咀嘴」（圖），此片段一出即時引發「法比仔係基佬」論，之不過原來法比仔係想玩嘢扮「門神」卡斯拿斯奪世盃後，嘴靚女友主持個幕，法比仔真係用心良苦啦！