民以食為天，小妹係呢句話嘅信徒，知道旅發局本周末一連兩日舉行國際龍舟邀請賽，聽日起連續三日會喺尖東百周年紀念花園搞個「生力暢飲樂園」，設咗20個啤酒同地道小食攤位，早幾日咪走去試食囉，飲咗頭淡湯。
用兩種米包糉
攤位之一嘅星馬殿餐廳負責人Simon話，參加呢次嘉年華諗到頭都大埋，最後決定將招牌菜海南雞飯，變身做海南雞糉，方便啲人企喺街邊食。
餐廳行政總廚Muller話，炮製海南雞糉花好多心機，因為要用糯米同油飯，而兩者煮熟時間好唔同，經多次反覆嘗試後，決定分別煮熟兩種米，再用七分糯米，混入三分油飯包糉，「咁就可以有糯米嘅黏實效果，又會有油飯嘅香味」。佢話啲油飯與坊間嘅唔同，加咗班蘭葉粉，好處係唔使加咁多油都好香。
Muller話，傳統海南雞飯有橙色酸辣醬、黑色醬油、薑汁三種味道，改造海南雞糉為咗保存原味，先將薑汁加入飯，又用薑汁醃雞，啲糉就會有薑味，食嗰陣點埋其他兩種汁，就同食緊海南雞飯一樣。
海南雞糉賣$30，配一款小食如番薯條、三色糕等同飲品$55。
鴻星都有喺會場擺檔，公關姐姐Erica話，會賣一啲可以送啤酒嘅小食，好似脆脆銀魚、辣酒煮花螺、瑞士雞翼同埋日本芝士腸等，如果熱到口乾就可以飲支楊枝甘露。各款小食賣$15至$20不等。
電郵：mailto:[email protected]