近期因為霸王洗頭水「有料到」事件，洗頭時都順便用開嗰支有冇類似成份，好彩見唔到，不過行開超市，平時專責格價嘅另一半話用開嗰隻洗頭水換咗新包裝，即時比較新舊樽，赫然發現由1000ml變成750ml，但價錢就一樣係69蚊，即係變相加價33%。
就算你自以為聰明轉用另一隻，其實天下商家一樣奸，而且用開冇事又唔想轉牌子，除非突然好似隻霸王（1338）咁爆出新聞。
不過市場上有的是選擇，例如美國大型生活消費品公司寶潔（Procter&GambleCo.），09年業績敵唔過大環境，出現10年未見過的下滑，但旗下洗髮護髮產品品牌眾多，計有VidalSassoon、Rejoice、Pantene、Wella及Head&Shoulders，單是其中3個最暢銷洗頭水品牌，市場佔有率就曾達66.7%。任憑股市跌跌碰碰，佢都冇穿冇爛，極具防守性，股價仍接近52周高位，每股企穩60美元之上。
寶潔硬淨具防守性
寶潔嘅戰略目標係要維持喺發展中國家年銷售額有18%增長，同時要佔總銷售額三分一，連續120年派息及連續54年增加派息，股息年複合增長率達9.5%，唔係好多公司做得到。
現時中國人喺寶潔產品上人均消費額為3美元、印度1美元、墨西哥20美元，只要將中印兩國人民嘅消費提高至墨西哥水平，已代表400億美元新增營業額，相當於按09年寶潔收入增長50%。
寶潔嘅主要競爭對手係法國歐萊雅、英國聯合利華（Unilever，旗下洗頭水品牌Dove、Lux），同荷蘭高露潔-棕欖（Colgate-PalmoliveCo.）。由於產品線大同小異，全球排名第二嘅聯合利華，一半收入來自新興市場，已不能貿然加價，惟有出此減料下策，同時寄望慣性用家寧願用減咗料嘅沙宣，都唔用加咗料嘅霸王。
胡孟青
作者為獨立股評人