革命不是請客吃飯，五區公投夠鐘埋單。5月補選候選人限期向當局提交選舉開支盤數，八方噚日翻查各人花咗幾多錢拉票，公、社兩黨連同大專2010共10個候選人，總共使咗約745萬元，以總得票數50萬票計，即係每票大約要用15蚊，同街坊福利同鄉會搞起錨遊行海鮮餐位位津貼200元比較，心算都計得出邊樣更加有益有建設性。
長毛食萬二蚊「牛肉乾」
公投10個候選人中，選區最大嘅新西陳偉業開支最多達172萬元，光頭嘅佢花咗1,600蚊買帽同頭巾畀自己同助選團戴，比較大筆嘅支出係慶功宴同義工飯盒錢，總共用咗$112,800，陳偉業申報有千幾人開飯，平均每人100左右。
朝廷不養餓兵，拉票食飯好正常，不過講到食得「豪」，長毛先至係獨領風騷。八方在長毛盤數入面，發現有一項萬二蚊嘅開支，全部都係「牛肉乾」俾人抄牌罰款。公投拉票期約個半月，長毛竟然食咗萬幾蚊「牛肉乾」，以320蚊一張計，即係收到超過30張告票，幾乎一日一張，就算冇締造歷史，都應該寫下一個紀錄。
一般司機收一張告票都牙痛咁聲，長毛不愧係公民抗命先驅，對違規不以為然，話拉票大過天，泊低架車就開工嗌咪，差佬唔通融佢都冇辦法，「牛肉乾」派到嚟，硬食囉！長毛仲有筆騎呢開支，數目好細，用198蚊買油紙遮同和尚頭套，係用嚟諷刺權貴無法無天嘅道具。
肥媽冇參選申報零開支
社民連有大食大，大專2012（周澄、郭永健、梁永浩、黎敬輝、黃永志）刀仔鋸大樹，食得十分克制。出選新界西郭永健5月底舉行「慰勞party」，招呼30人去茶記，埋單720蚊，平均24蚊位，最多一人一個常餐，仲要冇改凍飲。公投係阿爺禁忌，相信只此一次有今生冇來世，慶功慰勞宴豐儉由人應該都係最後晚餐，難怪公社兩黨，食咗先講。
黃毓民有檔私房牛肉麪，花得比較多錢嘅卻唔係飲食，而係網台節目，總共用咗72,000元；陳偉業亦使咗32,000元做facebook同網站管理，社民連被形容係網上執政黨，在網絡花多啲錢好合理。公、社兩黨候選人大部份選舉開支都由個黨負責，大專2012獲李柱銘捐款30萬元，連同其他捐款，自己畀錢有限。
候選人要按規定申報選舉開支，肥媽瑪利亞竟然都有份，冇參選嘅佢申報零開支，佢曾表示有意出選，大家以為佢是但噏，估唔到原來玩認真。
mailto:[email protected]