如果話「單腳」可以做到啲乜嘢，除咗玩單腳跳、集體回憶嘅兒童遊戲「跳飛機」等等外，本周六會喺北京主辦籃球慈善賽嘅「中國巨龍」姚明，就畀咗個超勁嘅答案廣大球迷，就係以「單腳」幫囡囡換尿片。
NBA火箭中鋒姚明上季因腳傷全季報銷，搞到中國球迷牽腸掛肚；之前仲有謠言話，佢新賽季頭兩個月都唔打得。
勁減50磅迎新球季
姚明日前現身上海大鯊魚嘅梅隴訓練基地，視察球隊訓練；身穿白色恤衫、白色波鞋嘅佢，好明顯以輕鬆裝扮，除去外界嘅猜測。姚明話自己康復情況良好，但10月前都唔會進行激烈對抗嘅比賽。
上周五已返回中國嘅姚明，外表睇落算係瘦咗，歸功於喺侯斯頓休養期間嘅地獄式特訓，減去唔少肥肉、輕咗50磅後體重回復正常嘅300磅左右，實行以「弗」爆狀態迎接新賽季；而佢嘅腳傷康復程度亦理想，心情自然靚，幾乎對傳媒所有問題都有問必答。問到國家隊情況，姚明話自己離開太耐，唔可以預測球隊喺世錦賽嘅成績；仲話如果大鯊魚教練團，認為前火箭球星兼姚明好友法蘭西斯啱用，作為老闆嘅佢就會「出手」搵人。
「踢吓葉莉就搞掂啦」
至於姚明嘅家庭生活，當然都係球迷、傳媒嘅焦點，身為上海世博宣傳大使之一嘅佢，「公關技術」當然亦達到上乘地步，先講明唔可以透露女兒嘅名字，搞到傳媒失望之際，佢就即刻化身「爛gag王」娛樂大家一番；呢次姚明嘅「搞gag」題材，就係佢太太葉莉。
姚明話：「我好享受照顧女兒嘅日子，現在我當然識得點幫女兒換尿片啦！其實我只需要一隻腳搞掂，你哋信唔信？」當傳媒一臉茫然之際，姚明就笑笑口話：「用腳踢一下葉莉，她自己就會搞掂啦！」姚明咁大男人主義，唔通佢唔怕俾葉莉扭耳仔？