日昨講世界盃，講八爪魚連中八場球賽結果嘅機率，用主客和（香港足智彩投注瓣數），每場有三個可能性，連中八場嘅機會係656分之一，當然係錯，因寫稿時突然寫漏一個「1」，實情應該係6561分之一，即0.015%，幾位讀者立即來電郵指出錯誤，多謝晒，謹此致歉。根據馬會足智彩規矩：主客和係在九十分鐘正常時間及補時之內嘅賽果計算，加時唔算。西班牙對荷蘭一場，如果買和就有錢收，買西班牙贏就輸咗，外電講八爪魚保羅連中八場嘅機率係256分之一，係因為水族館只給保羅兩個選擇，二嘅八次方就係256。
左丁山係東莞人，最近睇到新聞話東莞之袁崇煥像之下嘅一句廣東話：「掉哪媽！頂硬上！」不知何故，被官府捽掉，引起不滿，懷疑與政府打壓廣東話有關。廣州有百幾人到人民公園舉起口號牌：「廣東話起錨，煲冬瓜收皮！」幾好玩噃。東莞人有特別口音，我哋一聽就知，「掉哪媽」唔算特別粗口，東莞人有一句四字粗口，在「頂硬上」之前，更加粗豪，兒童不宜，左丁山懷疑袁崇煥帶領東莞子弟兵對抗清兵之時，好可能係講嗰句東莞人先至聽得明嘅粗口，而唔係所有廣東人都識嘅「掉哪媽」。
廣東人身材唔高大，與山東大漢、東北男士相去甚遠，但民國時期，廣東人在國民黨中係最勇悍嘅軍人，譬如北伐成功就倚賴東莞鐵軍，由東莞人張發奎將軍指揮，名震全國，左丁山細路時聽爸爸講故事，佢講到東莞將軍就會講到眉飛色舞。張發奎與蔣介石不同派系，四九年後來港定居，於1980年逝世，終年85歲，先父曾經見過佢一次，覺得非常榮幸。另外幾場著名戰役，一九三二年一二八保護上海之戰，由十九路軍廣東羅定人蔡廷鍇與東莞虎門人蔣光鼐率領廣東子弟兵頂硬上，以寡敵眾，可歌可泣，還有一位廣東韶關人薛岳，剿共、抗日皆戰績彪炳，共產黨紅軍「長征二萬五千里」，薛岳追蹤了兩萬里！抗日時，薛岳有長沙大捷，萬家嶺大捷，葉挺讚佢盛名永垂不朽。薛岳逝世於1998年，享年103歲。民國抗日戰爭三大勝仗，台兒莊大捷、長沙大捷、萬家嶺大捷，皆由廣西人（白崇禧、李宗仁），廣東人（薛岳）指揮，蔣介石偏幫嘅江浙幫將軍反而毫無耀眼戰功，唔知係唔係佢哋唔識講「掉哪媽，頂硬上」呢！