導遊兼撈埋sales，響全個地球嚟講，都唔係咩新聞。阿珍喪兇內地同胞單嘢，亦證明咗大陸人並唔係個個叠水兼捨得買嘢。不過，本地旅遊界又唔使咁灰，事關有調查顯示，原來南韓人先至係最鍾意買名牌，嗱嗱聲學定幾句韓文打底，應該更加有運行！
麥肯錫最近訪問咗五個地區/國家（包括美國、歐盟、日本、中國同埋南韓）嘅人，南韓有成46%受訪者喺過去一年，有加碼掃名牌貨；當大家都估名震全球嘅「2V殺手」（即LV同BV）──中國同胞會跑出，到頭來竟然會輸個馬鼻，以44%做阿二，其他三個地區更加只得單位數。唔通因為南韓經濟起飛，帶挈個個荷包腫脹，所以成功「升呢」做名牌發燒友一哥？
個報告仲提到，咁多地區入面，南韓人買完名牌之後係最冇內疚感嘅，亦係最唔介意拎出嚟晒命㖭！嘩……咁虛榮o架！份報告講得好妙，話南韓人之所以會咁，主要因為「單一文化」，即係咩？咪係「人有我有」嘅羊群心理囉！
其實華華睇完份報告後有啲啲傷感o架，事關香港人唔好話入唔到三甲，最慘係連畀人訪問嘅資格都冇呀，陰功！
李華華
mailto:[email protected]