這兩三年，彭志銘幾乎無處不在。
講o靚模、談潮語，由正字正音到「掉哪媽，頂硬上」，總見到次文化堂社長出來評論一番，感覺，如文化界的盧覺強。但社長本人，從來不喜歡以文化人自居，更遑論當一名「文化演員」，「黐線，如果我嘅料都係文化人，呢個文化界真係玩X完」。彭志銘今日跟記者說另一個故事，叫「抗賤幾廿年」。
清心正說 直擊要害
「好多人覺得我逢政府必反，大佬，我都想讚你做得好o架！」忙着為書展做準備的彭志銘說，從小到大都是「反賤分子」，逢賤必反，早幾十年凡見賤人，與友人聯手唾罵，對方最終總會自慚形穢，「嗰時啲人仲有羞恥心」。今天禮義廉之輩當道，抗賤工作何其艱巨，「好似林公公咁，贏咗都仲要寸你，呢啲人就正宗厚顏無恥啦」。
抗賤，手法是清心正說，直擊要害。有時，別人賤力太強，就要以賤抗賤，「有次上電台直播見到張信剛，佢話香港背後有好多國家係度暗啞底搞事，我賤，起勢咁問佢到底係邊幾個國家，點搞法，係都唔畀佢落台，佢面都青晒講唔出聲」。
活躍文化圈，圈內賤人多得嚇人。「乜嘢係文化人？乜嘢係知識分子？最緊要係有風骨！點解呢班友讀書越多越冇風骨？」文化人為飯碗，出書講飲食、足球，帶團去旅遊出遊記，「我心諗，你唔係應該講其他嘢咩，講波你留番比何鑑江啦仆街」。
淪落的，還有每年盛事書展，搞手貿發局反對o靚模進場，說她們的寫真集兒童不宜，彭志銘獨排眾議，只為反賤。「我冇話o靚模寫真集好，但係你貿發局處理方法賤，即係好似細路哥做錯事，我梗係話佢頑皮，但係如果個老竇又打佢又插佢眼，你覺得咁樣係好？」
屹立書展21年，比六四晚會歷史悠久，但堂主越做越心淡，無他，當你親眼看到展場變散貨場，見識過師奶如何手探書堆，大喝一聲「廢嘅」，再將書以放飛鏢手法飛回書堆中，唔死心已偷笑，「有人苦讀寒窗嘔心瀝血都係賣得30本，欣宜減30磅就賣30,000本，咁不如大家一齊食肥佢再減然後寫書算啦」。參展現金回籠快，一本書熱賣分分鐘救全家，「《老懵董》當年賣咗40,000本，我當時就爭緊人200萬，唔係阿董一命換一命我死Q咗啦」。
年輕一代 無根空洞
堅持還因為相信生命可影響生命，「我哋呢代成日講潮語、o靚模，係因為冇乜好討論，有乜深層次探討，大議題又唔到你發聲，咪惟有講啲瑣碎嘢。後生仔唔使讀歷史，周圍嘅古物又唔見晒，冇根又空洞，我希望最少都等佢哋有興趣睇吓字。」今年「新書」《次文化語言》，實是懺悔錄，「本書係94年出，出咗3,000本，有人睇完本書，後來寄番畀我，話本書粗製濫造一文不值，我一直銘記在心，今年重印，係要證明我重新改過」。
自力更生不代表老馬無火，書展今日開幕，彭堂主表示今早會有行動與多年宿敵貿發局玩鋪勁，「有幾大煲我真係唔知o架」。記者 夏志禮