球員打球證事件時有發生，但誇張到好似巴拉圭球員荷西柏度素咁想箍死個球證（圖），就極為罕見。單嘢發生喺上周六康塞普西翁贏流浪3:0嘅智利乙組聯賽，效力流浪嘅荷西柏度素因粗野攔截對手，俾球證美連拿出示第2張黃牌罰離場；佢不服判決郁手箍美連拿條頸，直頭想攞命咁滯，要啲隊友合力制服佢，美連拿先冇事。事後荷西柏度素拒絕為自己嘅野蠻行為道歉，仲決定劈炮唔撈，返巴拉圭搵食。荷西柏度素係唔啱，但球證美連拿都有問題，事關佢判一球12碼俾康塞普西翁，康塞普西翁第一次射入唔算，第2、3次射失又唔算，第4次入咗終於算數。一球12碼搞到要射4次，真係前所未見。