「人紅自然是非多」呢個係永恒嘅定律，「籃球之神」米高佐敦周日狠批「大帝」勒邦占士，投奔熱火同獲迪、保殊共組3巨頭係無膽行為，指其正好代表「新世代」冇咩道義責任感後，「SuperBig3」周一又再爆出另一單負面新聞。
呢單就係「閃電俠」獲迪周日講錯嘢事件。獲迪周日同熱火名宿莫寧，出席由佢哋兩人搞嘅籃球慈善賽，獲迪被傳媒問到，如果熱火下季連輸幾場會點時，心情興奮嘅獲迪以01年「9.11」遭受恐襲而倒塌嘅世貿中心（WorldTradeCenter）做比喻，指如果熱火下季輸好多場波嘅話，「災難性」會好似世貿再倒塌一樣。
美國「9.11」事件搞到逾3,000條人命傷亡，兩棟世貿中心先後倒塌嘅場面，就係最令美國人傷痛嘅疤痕；估唔到獲迪竟以此作比喻，即刻搞到人神共憤，群起而攻之！好彩獲迪亦知自己犯下大錯，好快喺周一就作公開道歉。
比喻不恰當迅速道歉
獲迪話自己原意其實唔係咁，佢只係想表達熱火實力強橫，不過並非唔輸得；只係如果真係輸波嘅話，其震盪性就如同世貿再次倒塌一樣嚴重。之但係一向知書識禮嘅獲迪，都好識「補鑊」咁話：「我衷心為我不恰當嘅比喻作出道歉，我實在唔應該咁講！」所謂經一事、長一智，我求大俠期望「SuperBig3」生性打好波，如果贏唔到總冠軍嘅話，就真係俾人笑餐飽啦！