被稱為「地產業界預言家」嘅國內地產商潘石屹興建豪宅、商廈無數，原來最有興趣係興建廁所。SOHO中國董事長潘石屹喺甘肅天水農村成長，衣錦還鄉，過去四年返老家推動「兒童美德發展工程」，每年平均花成千萬人民幣。
潘董除咗想教導貧困兒童要誠實、有禮貌、團結、有責任感同整潔等19種基本美德，仲興建咗45個廁所，因為文明由廁所做起，學生注重衞生，疾病都少啲。窮鄉僻壤孩子天生天養，未用過坐廁，所以個別學校要喺廁格畫符號教學生正確如廁姿勢。
10個甘肅天水小學生近日跟潘董嚟香港，同200個天水圍小學生交流，每人獲100蚊書券去書展買書。