睇上市公司通告，一般嚟講，除咗盈利警告，會令人有少少唔安樂嘅，應該就係換核數師！大家都知核數師對公司盤數，理論上同邏輯上都應該係最清楚嗰個，佢哋份報告更加係盤數嘅指標，換親核數師，通常無好嘢！
不過凡事有例外。噚日華華睇港交所通告嗰陣，見中亞能源（850）通過換核數師，即刻開出嚟，換出邊個並唔重要，見到佢換入德勤，先至係重點！財圈界係人都知，有四大會計師樓之一做公司核數師，係幾咁有代表性呢！
咁點解華華會咁留意850換核數師呢？事關佢哋喺今年1月，副主席兼營運總裁鄺社源惹上官非，畀兩個響07年曾經幫佢搞天然資源生意嘅人入稟追佢100萬銀，因為雙方曾經協議可以平分鄺社源響新業務得到嘅收益……唔知換核數單嘢，同呢單官司又有冇關呢？
李華華