蘋果平板電腦iPad喺外國賣咗三個月，呢個禮拜五香港終於有行貨，嗰價平過同樣有全球保養嘅平行進口貨起碼1,000蚊。普通純wifi版16G、32G及64G，分別賣3,888、4,688及5,488，每款相差800蚊，若要買可以插MicroSIM卡上網嘅3G版，每款貴多1,000蚊，即3G版64G賣6,488蚊。
不設預訂後日發售
小妹噚日打去蘋果一啲指定店舖問吓可唔可以預訂，點知幾間都話冇得訂，理由係唔知入貨幾多，要後日朝10點起自己走落去買。
不過好奇怪，小妹試探佢哋賣幾多錢，啲店員都話未知。乜蘋果官方前日唔係公佈咗行貨售價咩？店員繼續話唔知。小妹打電話畀旺角先達「數碼動力」老細Eric林福林打聽吓，佢話收到業內堅料，有指定店舖會以綑綁式手法賣機，要買就要畀多600至700蚊，買埋清潔用品同保護貼等豬頭骨。小妹問蘋果公關部係咪准許咁做，點知成日都冇回應。
Eric話，若指定店舖逼顧客買埋豬頭骨，咁就同佢啲平行進口貨售價相差縮窄，喺全球爭購下，本港行貨短期內供應唔會多，佢啲貨嘅價可以企穩，至多減幾百蚊，唔擔心冇人買，況且家大陸客佔七成，每日賣畀本地客都有約40部。
小妹問過喺港大、理大和調景嶺IVE嘅指定學校店舖，都話校內人士可以用官方價買機，有朋友喺呢三間院校工作或讀書，咪搵佢哋幫吓手。上呢處 http://www.apple.com/hk/ipad/buy可以查到邊度有得買iPad。
mailto:電郵：[email protected]