天匯癲價搞到滿城風雨，四叔怕且頭痕兼頭痛，江湖傳聞前房署女高官鍾麗幗係幫忙拆彈嘅幕後軍師，呢個軍師能否為四叔解憂，唔使八方多講，相信大家有目共睹。噚日有消息傳出，四叔搵到曾幫煲呔助選嘅游淑儀助陣。
游淑儀係公關界姐級人馬，之前做哲基傑訊公關聯席董事總經理，本月初加盟美資公關公司安可顧問出任高級副總裁。
游淑儀強調冇跳槽
八方噚日問游淑儀是否幫四叔手，佢矢口否認，話自己返新工僅十幾日，冇可能又跳槽，又強調冇興趣入大公司做公關。至於四叔啲公司有冇幫襯佢，「我都想有咁大個客」。
既然游淑儀咁講，四叔又等人用，可能一拍即合喎。