藍天白雲下　駕馭寧靜

香港的藍天白雲越來越矜貴，幾日即逝，即使有機會將LEXUSRX450h據為己有五天，但首四天不停下雨，心情跌入谷底。第五天終見陽光，決定去白泥走一轉！駕上這架養眼白色霸王，寧靜行車令我放鬆，車身散發閃耀白光，引來不少艷羨目光呢！

記者：許維雅
攝影：譚盈傑
模特兒：Snow

藍天白雲風騷之旅

將軍澳→元朗大發茶記嘆早餐→沿流浮山方向直達白泥

深灣路是單線雙程行車，駕着龐大車身，避車一樣輕巧。

九毫一公里好慳油

以油電混合動力推動的RX450h，雖然馬力總輸出達300匹，但廠方提供的平均油耗只是14.7km/L，心理上已覺得去幾遠都不怕油費貴，加上入元朗多行高速公路，經常以ECOMode行車，耗油顯示更可低至15.5km/L，以每公升汽油約$14.2計算，大馬力的車只需約$0.9一公里，的確只有Hybrid先做得到。除了慳錢又環保，極之寧靜舒適的駕駛感受亦值得讚賞，着車、停車及低速行車時，特別感受得到車廂那股份外的寧靜，令我更享受到這趟藍天白雲之旅帶給我的悠閒。

■車廂闊落坐得舒服，另設有天窗，抬頭便可看到藍天白雲。

起步加速慢慢提升

由將軍澳去到元朗嘆早餐，再往流浮山方向去白泥，車程前後揸足一小時，但軟熟的真皮梳化及定速巡航系統等窩心配備，令人不覺是苦差。速度方面，可以行100km/h的青朗公路盡顯其力量澎湃的實力，可惜始終是混能偈，起步加速欠缺一點爆發力，力量輸送要逐步提升。去到目的地，其他人愛日落，我卻認為對住個大海曬日光浴才是樂事，白車身夠晒Sporty，令霸氣十足的車身肌肉線條更誇張，我都覺得自己特別有型呀！