醫學界前立法會議員郭家麒08年連任失敗，又備戰捲土重來。噚日宣佈加入公民黨，原來公民黨06年創黨時已招攬佢，但當時郭醫生想保持獨立身份，四年後終於成事，黨魁余大狀同主席關信基噚日仲喺黨部為佢搞迎新茶敍。
郭家麒曾任中西區議員，入黨似乎係想為參選鋪路，郭醫生坦言自己有能力亦有興趣，但暫時未諗呢個問題，強調入黨係眼見企硬堅持唔妥協爭取民主嘅人已經係少數（暗寸民主黨轉軚），所以佢唔可以繼續孤身作戰。余大狀笑稱郭醫生向來樂於扶助弱勢社群，入黨係身體力行扶弱。余大狀又報喜，話黨員人數歷史性400多人，有望邁向500。
郭家麒早前同公民黨張超雄、退出公民黨嘅譚香文組成「關懷香港」，家陣佢同張超雄已成黨友，唔知譚香文有冇興趣翻啅公民黨呢？