陳可辛（Peter）監製、谷德昭導演嘅喜劇《神奇俠侶》，安排咗春節檔期喺內地同香港同步上映。吳君如同古天樂飾退隱江湖俠士，但又不甘寂寞出山鋤強扶弱。
為咗宣傳套戲，Peter同谷德昭之前同內地嘅湖南衞視搞咗個名為《我要拍電影》宣傳活動，喺過萬名參賽者裏面選出三個人，幫《神》片分別拍咗三條宣傳片。谷德昭接受電話訪問時話：「段宣傳片係佢哋自己構思同拍，我哋就真係搵咗君如同古仔畀佢哋拍。」三條神奇宣傳短片題材分別係《登月》、《高爾夫球》同《超人》三個古仔。
資助千萬拍片
谷德昭仲話三條拍出嚟嘅片都好有水準，而當中有一位更會獲湖南衞視資助大約1,000萬人民幣拍一部賀歲片，佢就講笑話：「咁咪即係拍嚟打我哋，不過戲種應該唔擔心，因為同期都冇一部純喜劇搞笑片。」Peter就話唔用電影片段宣傳係希望為電影保持神秘感。三個古仔無論技術同笑料都係《登月》最好，現場播時笑聲都係最多嘅。」