隔牆有耳:意見不接受 高官吹風照舊 - 李八方

隔牆有耳:意見不接受 高官吹風照舊 - 李八方

區高官名為問責官員,實際上藏頭露尾,近年人人吹風成癮,光明正大記者會越來越少,暗啞底搞吹風會多不勝數。講解公眾關心重大政策,司長、局長有責任公開說明,唔知點解近年匿埋先敢講,記協最新一期《記協之聲》批評濫用吹風手法削弱市民知情權,皆因高官閂埋門講嘢,無名無姓隨時可以講過唔算數,加上吹風會經常選擇性「邀請」記者出席,同政府唱反調嘅傳媒當然冇份。

環境局發表聲明撐局長

記協批評有理,高官卻有錯不認,繼續死撐。環境局噚日發表聲明幫局長邱騰華辯解,指邱騰華07年7月上任起,共召開六次大型記者會,又詳細列出邱騰華接受電台、電視台訪問次數,喺公開場合多次回答記者提問,總之邱騰華就成日見記者啦。
三年開六次記者會,平均一年兩次,當中有啲係公關騷,唔開大家冇損失,近期好多人關心嘅停車熄匙立法問題,又唔見邱騰華開個「大型記者會」,親自上陣為條例草案護航喎!邱騰華不忿被插作出反擊,其他局長都好唔順氣,一個負責打擊藥駕嘅最高級問責官員,噚日簡短會見記者後,又搞閉門吹風會。
由於吹風會規定不能公開該局長名字,只可引述是政府發言人講嘢,因此八方都要守規矩。呢位「政府發言人」話,其實官員成日都有見記者,唔係只搞閉門吹風會,暗示記協批評不公道。聽到「政府發言人」咁委屈,即場有記者建議將吹風會改為公開記者會,不過「政府發言人」充耳不聞。官字兩個口,冇耳仔,難怪高官聽唔入耳。

反映官員唔敢面對大眾

意見不接受,作風亦照舊,八方聽聞今日又有「政府發言人」舉行吹風會講香港發展事宜,對記協批評置若罔聞。特區高官廢話連篇,佢哋開記者會,八方相信市民都十分抗拒聽佢哋打官腔,身為所謂問責官員,只愛閂埋門講嘢,反映佢哋唔敢面對市民大眾,咁仲做乜鬼問責高官?力有不逮就唔好尸位素餐,過主啦!

mailto:[email protected]