西班牙隊長卡斯拿斯贏世界盃後，同主播女友莎拉卡邦拿路嗰深情一吻，贏盡全天下喝采聲；事隔一個禮拜，同一幕幾乎倒模發生喺科蘭身上，佢喺個廚藝節目中同另一半娜拉（ZairaNara）錫錫。錫完，佢兩個就靜雞雞飛抵邁阿密度假，科蘭捱足成年，大家亦係時候放佢一馬，畀佢鬆一鬆啦。
邁阿密度假嘆世界
唔計上季季前球會賽，科蘭由舊年8月中開始參戰歐聯附，到幫馬德里體育會贏歐霸盃，然後喺今屆世盃為烏拉圭殺入4強，自己仲贏埋金球獎，忙足成年咁滯。唔好忘記佢踢完世界盃後，一直被傳媒追訪，忙到嘔，身心疲累。眼見科蘭終於有長假放，娜拉自然識做，明明忙於發展演藝事業都放低晒手頭上所有工作陪愛郎，佢噚日仲喺twitter度好high咁話「呢個地方好正呀，要好好嘆吓。」
查實喺佢兩個飛去邁阿密之前，仲做場接吻騷畀大家睇。話說科蘭日前上咗阿根廷一個廚藝節目，主持問吓佢啲煮嘢心得，大家可以想像個主持人醉翁之意不在酒，好快就將視線轉去科蘭同埋娜拉嘅關係度。
上廚藝show被擺上枱
我求大俠聽唔明西班牙文，睇片都估到咩環境，好明顯個廚藝節目好似變成玩新郎新娘，個主持要求兩個錫錫。睇科蘭同娜拉個表情，最初都有啲尷尬，女方似乎想用飛吻了事，但擾攘一輪，加埋現場觀眾壓力，最後冇辦法唔就範。呢一咀擺明唔及卡斯拿斯錫女友嗰啖咁激，但絕對情真；家陣咀完，球迷收貨喇啩。
如果嫌呢吓錫錫未夠喉，近日網上仲有一段模仿日本經典漫畫《足球小將》嘅短片，歌頌呢位金球獎得主，大家有興趣可以上網睇睇（ http://www.youtube.com/watch?v=VPgQVJqt0wA）。