今年書展貿發局趕絕o靚模，令好多毒男、宅男好失望，華叔fans可能都冇晒心機，因為華叔要靜心養病，今年唔會現身書展同讀者見面或簽名。
剛做完電療身體較弱
為華叔出新書《起看星斗》嘅次文化堂彭志銘同八方講，過去10年華叔年年坐鎮書展，今年因為癌病在身，剛剛做完電療身體比較攰，加上書展好多人，為免感染病菌影響健康，所以破例唔去書展。彭志銘又話，往年華叔書展出新書最遲5月就搞掂，今年押後至上禮拜先開始印刷，幸好趕得及書展推出。
雖然華叔今年唔到場，但為免華叔支持者失望，彭志銘話會有特別安排，讀者可先付款買書，出版社將書籍交華叔親筆簽名後，再安排大家領書。華叔證實患癌後，彭志銘稱其著作好賣咗，徇眾要求今年特別再版華叔舊作《化作春泥》，據佢講呢本書斷貨多時，係比較多人想補購嘅書，再版印1,000本，未買嘅就要把握機會。