英超殺埋身，但電視直播權，同世盃一樣落在「畸寶」懷抱，令幾年前因為講英超而駐紮「現在台」嘅評述員丁偉傑，日前決定分身回流舊東家廣州市台，一邊喺香港講西甲同MUTV（曼聯電視頻道）、一邊就喺廣州講英超，實行與啱啱加入老襯行列嘅何輝再爭逐廣東省首席足球評述員嘅地位。
傑仔講波做足功課，無論係足球或籃球都一樣掂，同何輝、Keyman及「桂神」，堪稱講波佬Big4。傑仔呢幾年一直喺「現在台」講英超，但「畸寶」今年以天價重奪香港嘅英超獨家轉播權，令傑仔失去主要戰場。我求大俠早前就同傑仔傾過，佢話依然會喺「現在台」講西甲同MUTV，但周中同周末就會返廣州市台講英超同歐洲球會賽，實行中港兩邊走，兼衝擊啱啱小登科嘅何輝喺廣東省最受歡迎足球評述員嘅地位。但傑仔效力嘅廣州市台相比老友何輝嘅廣東省台，規模有啲距離，加上後者老襯當旺，要爭做廣東「1哥」也絕非易事。